អង់គ្លេស៖ ក្លិបបិសាចក្រហម Manchester United បានប្រកាសនៅថ្ងៃច័ន្ទនេះថា អ្នកគាំទ្រទាំងអស់ដែលមកទស្សនាការប្រកួតនៅកីឡដ្ឋាន Old Trafford គប្បីត្រៀមខ្លួនឱ្យបានរួចរាល់សម្រាប់ការពិនិត្យពាក់ព័ន្ធនឹងវិធានការបង្ការកូវីដ-១៩ ស្របពេលដែលអាជ្ញាធរសុខាភិបាលនឹងចាប់ផ្តើមរឹតបន្តឹងលើអ្នកចូលទស្សនាការប្រកួតបាល់ទាត់នៅអង់គ្លេស។ គួរឱ្យដឹងថា ក្លិប Manchester United នឹងបើកទ្វារកីឡដ្ឋានរបស់ខ្លួនទទួលស្វាគមន៍ក្រុម Newcastle United នៅថ្ងៃសៅរ៍នេះ។ 

លក្ខខណ្ឌសំខាន់ជាគោលមុននឹងអាចចូលទស្សនាបានរួមមាន អ្នកគាំទ្រដែលមានអាយុចាប់ពី ១៨ឆ្នាំឡើងទៅ ត្រូវតែបង្ហាញថាខ្លួនបានចាក់វ៉ាក់សាំងរួចរាល់ ឬបង្ហាញលទ្ធផលតេស្តអវិជ្ជមានកូវីដ-១៩ ដោយម៉ាស៊ីន PCR ឬមានលទ្ធផលអវិជ្ជមានពី Rapid Test យ៉ាងយូរបំផុតត្រឹម ៤៨ម៉ោងមុនការប្រកួតចាប់ផ្តើម។ 

គួរ​បញ្ជាក់ថា វិធានការសុខាភិបាលថ្មីនេះបានដាក់ចេញសម្រាប់ការអនុវត្ត បន្ទាប់ពីរដ្ឋាភិបាលនៃចក្រភពអង់គ្លេសបានលើកឡើងថា ការត្រួតពិនិត្យវិញ្ញានប័នបត្រ ឬភាពបញ្ជាក់ថាមានសុវត្ថិភាពពីកូវីដ-១៩​ នឹងអាចក្លាយជាកាតព្វកិច្ចមួយសម្រាប់បុគ្គលដែលមានបំណងចូលរួមព្រឹត្តិការណ៍ធំៗ ឬទីកន្លែងដែលមានហ្វូងមនុស្សច្រើនកុះករ ចាប់ពីថ្ងៃទី០១ ខែតុលានេះតទៅ។

ដោយឡែកនៅក្នុងសេចក្តីថ្លែងការណ៍របស់ក្លិប Manchester United បានបញ្ជាក់ថា៖ "Manchester United មានកាតព្វកិច្ចធ្វើតាមការណែនាំរបស់រដ្ឋាភិបាល ដើម្បីធានាថាអ្នកគាំទ្រទាំងអស់អាចចូលរួមការប្រកួតដោយសុវត្ថិភាព និងព្យាយាមជៀសវាងការហាមឃាត់មិនឱ្យមានអ្នកគាំទ្រក្នុងចំនួនច្រើនចូលរួមទស្សនានាពេលខាងមុខដែលបណ្តាលមកពីកូវីដ-១៩"៕